Transcription: Les Épitaphes des Neuf Preuses (Paris, BnF, fr. 2206)
Les epitaphes des neuf preuses
Thomyris fuz en armes bien habille
Des gens cyrus feis mourir deux cens mille
Luy estant roy Je luy couppay la teste
En luy monstrant son orgueil manifeste
En vng tonneau le mys de sang tout plein
Disant/ or boy ton saoul de sang humain
Semiramis/ en tous lieux on mappelle
Car iay tenu/ ydias en tutelle
Les barbarins/ et ethiopiens
Ay subiugue/ et mys en mes lyens
En me pignant/ de bataille euz nouuelles
Demy pignee/ je conquis les rebelles
Menalape fuz en mon temps nomee
Preuse vaillante/ et de grand renommee
A acquerir bruit/ tellement entendy
Que je conquis/ hercules le hardy
Mon prisonnier/ le tins en vne place
Puis pour mary le prins et luy feys grace
Amazone suys qui par ma prouesse
Damazone fuz royne et maistresse
A lespee je menay telle guerre
Que en peu de temps/ dasie conquis la terre
Par force darmes/ et victorieux faitz
Deuant Troye/ conquis dyomedes.
Nommee suys Royne Lampheton
Qui en Siche acquis bruyt et renom
Le Roy Vepage et son pays destruys
Capadoce gaignay le feu y mys
Et theseus mys en subiection
Puys lespousay en luy faisant pardon
Creusa Je suys qui sus les syriens
Long temps regnay/ et conquis plusieurs biens
Ma force fut/ en mes jours sy monstree
Que nul nosoit assaillir ma contree
Sur les Romains je feys sy forte guerre
Que les conquys et mys paix en ma terre
De nom je suys pantasylee
De cueur vaillant/ aux armes bien stillee
A troye vins/ venger la mort hector
Contre les grecz/ troys Roys et plus encor
Je combatiz sans auoir nul secours
Dont fuz nommee/ noble preuse en mes jours
Hypolite en mes jours nommee fuz
Qui par mes armes le roy theseus
Dix ans et plus/ luy menay forte guerre
En conquerant/ grant partye de sa terre
Le pourchassant/ asprement et tresfort
En la parfin/ luy fys souffrir la mort
Par mon droit nom/ fuz nommee Deiphille
Preuse hardye/ Jadys fuz de Roy fille
Tant employay/ la force de mes bras
Que aux thebeiens/ lorgueil je Ruay bas
Puys jespousay/ et prins soubz bonne foy
Pour mon mary/ Polides filz de leur roy.