Transcription: Le Livre du Champ d'Or, Paris, BnF, fr. 12470, fol. 47v-49r
ix. preux sont trop bien le sauon
Et aussi neuf preuues auon
Qui sur tout amoient honneur
Et eschiuoient deshonneur
Et pour ce leurs faiz sont trouuez
En haulx liures et approuuez
Trouuer les puet on en latin
Par acteurs pompee justin
Par euzebes et par oroze.
Auec maint autre belle chose
Les grans prouesces quelles firent
Com je treuue en ce quilz escrirent
Et es dicties de maint autre homme
Qui nest ja mestier que je nomme
Ce martel auec eulz portoient
Ces dames qui bien en forgoient
Synope ne loublia mie
Qui fu royne de feminye.
Quant hercules le combatant
En fist fuire trestout batant
Et leust descomfist sans faille
Sil eust attendu la bataille
A tous mena si bonne guerre.
Quelle conquist toute la terre
Qui a la sienne estoit voisine
Ceste dame puissante et digne
Vn noble escu dazur portoit
Ou lyon dor rampant auoit
Qui les ongles auoit dargent
De gueules vn escuçon gent
Au destre cornet a iii. testes.
De dames blanches moult hounestes.
De couronnes dor couronnees.
Dont les armes sont mieulx parees
Bien en forga nen doublez mie
Thamaris quant par sa maistrie
Print et occist sans nul remede.
Ciryn roy de perse et de mede
Et de ses gens bien iic. mille.
Puist mist sa teste en vne pille
De sang plaine et dist boy asses
Du sang dont ne fus onc lasses
Escu de deux moities parties
Auoit qui sont moult bien parties
Dor et dazur lune ondoyee.
Lautre de gueules bien paree.
De trois testes moult souueraines.
Et couronnees comme roynes
Menalippes et Ypolite
Des gens Sinope dessusditte
De ce martel forment forgoient
Quant lost Sinope gouuernoient
A hercules se combatirent
Si fort qua terre labatirent
Et theseus ses bons amis
Refu par elle moult mal mis
Or orres merueilles a dire
Ceulx que ne puent nul descomfire
Non plus que silz feussent de fer
Par qui com len dit ceulx denfer
Furent descomfis et batus.
Ceulz ont ces femmes abatus
Et de ceuls de grece jnfinis
Decoppez naurez et finis
Trois lions passans et nassens
Orent ces dames par leur sens
Dor assis dedans vn escu
De gueules quant deulx fut vaincu
Hercules auec theseus
Par ces dames et receus
Deyphile et sa seur argine
Qui sentramoient damour fine
Par ce noble martel et chier
Ceuls de thebes firent vvidier
Quant aidierent au duc dathenes
Et leur donnerent moult de peines
Car toute la cite pillerent
Et les citoiens tuerent
Les murs aussi tous abatirent
Et la cite depuis ardirent
Dargent a vn griffon de gueules
Deyphile auoit armes tieulles
Escu de gueules ot argine
Ou auoit iii. testes de royne
De lampheto fut bien prisie
Ce martel et bien aprisie
Quant la terre de femenie
Toute tint auec marsepie
Et subiuga en sa saison
Europe aise toute epheson
Mainte cite y abati
Et tormenta et combati
Et sen fonda pluseurs nouuelles
Qui sont encor fortes et belles
Lors fu ceste dame honnourable
Armee dun escu de sable.
Ou jl auoit dargent vn cigne
Au bec pendu escuchon digne.
De gueules ou auoit iii. testes.
De Roynes et non pas de bestes
A ce martel mist grant entente.
Semiramis la royne gente
Qui fut royne de babilone .
Je croy concques dessoubs le throne
Si vaillant dame ne vesqui
Aise subiuga et vainqui
De midi a septemtrion
Mist tout en sa subieccion
Gent fiere et gent barbarie
Submist tout en sa seigneurie
Et zoroastrum le fort roy
Occist elle par son arroy
Ethiope acquist par sa guerre
Et enuay Inde en quel terre
Nentra onc qualixandre et elle
vne fois sa cite rebelle.
Fut et come elle se pegnoit
Nouuelles on lui apportoit
Son chief laissa a atourner
Sans autrement soy ordonner
Les ala mettre en obeissance
Par son sens et par sa vaillance.
Elle fu emperiere et royne
De maint royaume par sa paine
Ses armes furent blesonnees
Dazur a iii chaieres dorees
La royne des Irriliens
Thema. lama sur toute riens
Quant ot la grant cheualerie
Et mainte terre en seigneurie
Et aux Romains grant guerre fist
Tant quen maint lieu les descomfist
Et chaste fut toute sa vie
Pourquoy doit bien estre prisie
Dargent a vn aigle de sable
Portoit ceste dame honnorable
Par maint pais par mainte terre
Porta ce martel en sa guerre
La royne Panthasilee.
Qui fu de Priant appellee
A secours contre les gregois
Et les malmena maintefois.
Et vaillanment maintint sa guerre
Des plus vaillans deulx mist par terre
Oncques nul ne les greua tant
Apres hector le combatant
Dun escu dazur fu armee
Ceste royne panthasilee
Qui estoit seme de sonnetes
Dor qui estoient jolietes.
Ces ix. preuues si bien soigerent
Que leurs beaux faiz les honnourent
Tant que par tout est remembrance
De leurs faiz et de leurs vaillance
Et si firent maint autres dames
Qui furent sainctes preudefemmes...